ONS VERHALE

Ons Verhale

LGG Afrikaans Getuienisse

Bianka, Suid-Afrika

Wat LGG vir my beteken is moeilik om in woorde te sit, omdat die gevoelens so oorweldigend is. Soos ek hier skryf rol die trane, want hierdie Bybelstudie het my lewe in Christus gered.

Toe my man my los vir n ander vrou was ek verpletter. Ek het gebid en elke Bybelstudie gelees wat ek my hande op kon neerlê, om te probeer sin maak van hierdie ontploffing in my lewe. Toe stuur God vir my n stukkie op Facebook wat uit ‘n Love God Greatly Afrikaans studie kom, en ek sien toe daar is n groepie om aan deel te wees en ons kon gebedsversoeke gee. Dit was presies waarna ek gesoek het! Velia het vir my begin bid saam met hoeveel ander en die Here se ingryping is duidelik sigbaar in elke asemteug wat ek neem.

Ek het aan die einde van Week 3 van die Beloftes van God studie begin, en dit op Facebook gevolg. Ek het die studie aanvanklik nie ten volle begryp nie, min wetend waarvoor SOAP staan. Toe ek die nuwe studie moes aflaai, het ek die ander studies se materiaal gesien. Die stukke op Facebook het reeds so baie gehelp dat ek die Verlosser en Beloftes van God se materiaal afgelaai het. Ek het gebid en gesmeek dat Hy asseblief moet ingryp en net vir my wys dat Hy daar is vir my. Dat ek nie te laat is nie. Dat Hy my nie ook verlaat het nie. Sy antwoord die volgende oggend was… Jesaja 41:10 “Moenie bang wees nie, Ek is by jou, Moenie bekommerd wees nie, Ek is jou God. Ek versterk jou, Ek help jou, Ek hou jou vas, met My Eie hand red Ek jou.”

Hoeveel meer wil ek hê Hy moet dit vir my uitspel? My genesing het hier begin. Ek het na die Lewensredder gesoek en geswem en kop bo water probeer hou. Toe skep Hy my uit en aan Sy voete sit ek nou, vandag en vir elke dag wat ek nog op hierdie aarde sal hê. Maak nie saak of ek meeste van my studies in Engels doen nie, Afrikaans bly my moedertaal en is die Vader se Woord nie meer ingrypend as Hy met jou in jou moedertaal praat nie?

Martie, Suid Afrika

Die blote feit dat ek hierdie studies in Afrikaans kan lees beteken vir my ongelooflik baie. Dit beteken ek verstaan dit wat ek lees soveel beter. Baie van hierdie studies is in Engels, en omdat Engels nie my huistaal is nie, moet ek gereeld eers ’n woord of twee of drie gaan naslaan om te kyk wat dit beteken, om die ware betekenis van die stukkie ten volle te begryp en te verstaan.

Maar behalwe die taal, verryk hierdie dagstukkies en studies my lewe soveel. Ek leer baie van myself, ek doen introspeksie, sien waar doen ek verkeerd. Mens is so geneig om die heeltyd teen een ding vas te kyk en ’n ander aspek te verloor of mis te kyk – ek dink spesifiek aan die Jona studie.  Ek het altyd net gekyk na Jona wat nie luister na God nie en toe word hy gestraf. Maar vir die eerste keer het ek besef ek is ook maar ’n Jona, want ek wil ook nie luister nie. Ek het gesien hoe ek nie wil luister vir God nie. Dit nadat ek regtig introspeksie gedoen het.

Die ander lekker ding is om dit per e-pos te kry. Dit beteken, ek kan altyd weer teruggaan na ’n studie en weer iets gaan lees. Ek kan myself weer gaan herinner, ek is ’n vrou, God sien my raak, Hy sal my nooit los nie, Hy sien die trane, die swaarkry en bekommernisse, tog sorg Hy elke dag vir my! Ek het weer geleer om al my bekommernisse vir God te gee – Hy dra my bekommernissse beter as wat ek dit kan dra.  Ek het weer geleer wat dit beteken om nie bekommerd te wees oor die dag van more nie, dit is nie belowe nie, slegs God se liefde is belowe vir vandag en elke dag van die res van my lewe! Ek het geleer om net te lewe vir vandag. Maar bowenal het ek geleer, dit maak nie saak wat wie sê of dink nie, al wat saak maak is God!

Om in aanraking met die LGG Afrikaanse Tak te kom:

Ken jy iemand wat ons Love God Greatly studies in Afrikaans kan gebruik? Indien wel, vertel hulle van LGG Afrikaans en al die ongelooflike Bybelstudie hulpbronne wat ons voorsien om hulle toe te rus met God se Woord!!!